काठमाडौं।  प्रधानमन्त्री वालेन्द्र शाहले कुनै पनि पेसागत सफलताका लागि पहिलो मानक नैतिकता, निष्ठा र इमानदारीपन आवश्यक रहेको कुरामा जोड दिएका छन्।

राष्ट्रिय प्रहरी प्रतिष्ठान महाराजगञ्जमा आज आयोजित प्रहरी निरीक्षक आधारभूत तालिम १-१८४औँ समूहको दीक्षान्त समारोहमा प्रधानमन्त्री शाहले तालिममा सिकेको सिकाइलाई पूर्ण रूपमा आत्मसात् गर्न र व्यवहारमा उतार्न दीक्षित हुने सबैलाई निर्देशन दिएका छन्।

उनले पेसागत आचरण र अनुशासन कायम गर्दै, संविधान, प्रचलित कानुन, नियम, कार्यविधि र मापदण्डको सही रूपमा पालना गर्नु वा गराउनु व्यक्तिको पेसागत सफलता रक्षा गर्न अहम् आवश्यकता पर्ने बताएका छन्।

साथै, जिम्मेवारीप्रति जवाफदेहिता पनि महत्त्वपूर्ण पक्ष रहेको र प्रहरी सेवामा आबद्ध रहँदै गर्दा यी कुराहरूलाई अनिवार्य रूपमा कार्यान्वयन गर्न उनले आग्रह गरेका छन्।

सधैँ अग्रभागमा उभिएर देशमा निरन्तर शान्ति सुरक्षा कायम गर्ने, अपराध अनुसन्धान गर्ने र कुनै पनि स्वतन्त्रताको राष्ट्रिय रूपमा सही ढङ्गको रक्षा गर्ने प्रमुख जिम्मेवारी नेपाल प्रहरीको काँधमा रहेको कुरा प्रधानमन्त्री शाहले स्पष्ट पारेका छन्।

यो महत्त्वपूर्ण जिम्मेवारी निभाउँदा कुनै पनि किसिमको अनुचित प्रभावमा नपरी र भेदभाव नगरिकन आफ्नो कर्तव्यमा कटिबद्ध रहन उनले निर्देशन दिएका छन्। उनले एकलभावले आफ्नो भूमिका र संस्थाको गति चल्दै छ भन्ने पाटोलाई राम्ररी बुझेर नागरिकको भावनाअनुरूप काम गर्नुपर्नेमा जोड दिएका छन्।

आफ्नो सङ्गठनमा पूर्णप्रतिबद्ध भई सहयोग र सहकार्यसँगै संलग्न रहन आग्रह गर्दै प्रधानमन्त्री शाहले सूचना प्रविधिको प्रयोगले कामलाई छिटो, छरितो, सहज र पारदर्शी तुल्याउन सकिने धारणा व्यक्त गरेका छन्।

यसरी प्रविधिको प्रयोगबाट समयको बचत हुने, समयमै अपराधको अनुसन्धान गर्न सकिने र समयमै घटनालाई नियन्त्रणमा लिन सकिने विश्वास उनले व्यक्त गरेका छन्।

अपराधको निष्पक्ष, तथ्यपरक, वैज्ञानिक र प्रविधिमुखी अनुसन्धानका लागि सूचना प्रविधिको सही सदुपयोग गर्नुपर्ने कुरा औंल्याउँदै उनले यस कार्यमा समग्र प्रहरी संगठनको नेतृत्व र प्रशिक्षणलगायतको पनि महत्त्वपूर्ण भूमिका रहने बताएका छन्।

सरकारले यस प्रकारको अनुसन्धानका लागि आवश्यक पर्ने स्रोत र साधन उपलब्ध गराउन र प्रहरीहरूप्रति आफ्नो जिम्मेवारी पूरा गर्न सधैँ प्रतिबद्ध रहेको उनले जनाएका छन्।

प्रधानमन्त्री शाहले आज दीक्षित हुनुभएका सम्पूर्ण प्रहरीहरूलाई हार्दिक बधाई ज्ञापन गर्दै उनीहरूको उज्ज्वल भविष्य र सफलताको कामना गरेका छन्।

साथै, उनले प्रहरी सेवामा आबद्ध हुन निरन्तर प्रेरित गर्ने परिवारजनप्रति पनि विशेष आभार व्यक्त गरेका छन्। उक्त दीक्षान्त समारोहमा जम्मा ७९ जना प्रहरी निरीक्षकहरू दीक्षित भएका थिए।