नयाँदिल्ली- ब्रिक्स शिखर सम्मेलनका लागि नयाँदिल्लीमा कडा सुरक्षा व्यवस्था लागू गरिएपछि राजधानीका बासिन्दाको दैनिक आवागमन प्रभावित भएको छ।

शिखर सम्मेलनलाई लक्षित गर्दै प्रमुख सडकमा ब्यारिकेड र जाँचस्थल स्थापना गर्नुका साथै विभिन्न क्षेत्रमा ट्राफिक प्रतिबन्ध लगाइएको छ। सुरक्षाका लागि हजारौँ सुरक्षाकर्मी परिचालन गरिएको छ। आवागमन सहज बनाउन सरकारले सार्वजनिक बिदासमेत दिएको छ।

सरकारी कार्यालय, विद्यालय तथा धेरै निजी व्यवसाय बन्द रहे पनि कार्यालय जाने कर्मचारी, डेलिभरी चालक तथा दैनिक ज्यालादारीमा काम गर्नेहरू भने प्रतिबन्धका कारण समस्यामा परेका छन्। सडक बन्द तथा मार्ग परिवर्तनका कारण छोटो दूरीको यात्रा पनि लामो हुने गरेको र कतिपय क्षेत्रमा ट्याक्सीको भाडासमेत बढेको स्थानीय बासिन्दाले बताएका छन्।

अटोरिक्सा चालक नीरज कुमारले सुरक्षा प्रतिबन्धको सबैभन्दा ठूलो असर न्यून आय भएका मानिसमा परेको बताए। ‘यदि एक किलोमिटरको यात्रा आठ किलोमिटरको चक्करमा परिणत भयो भने हामीले के गर्नुपर्छ?’ उनले प्रश्न गरे। विदेशी प्रतिनिधिको सुरक्षाको भार सर्वसाधारणमाथि पर्न नहुने उनको भनाइ छ।

त्यस्तै, डेलिभरी चालक मोहम्मद एलियासले प्रतिबन्धका कारण काममा पुग्न कठिन भएको बताए। ‘हामी काममा पुग्यौँ भने पनि ट्राफिकमा फस्नेछौँ। हामी काम गर्न सक्दैनौँ,’ उनले भने।