धनगढी — सुदूरपश्चिम प्रदेशका मुख्यमन्त्री कमलबहादुर शाहलाई हेलमेट नलगाई मोटरसाइकल चलाएको आरोपमा ट्राफिक प्रहरीले ५०० रुपैयाँ जरिवाना गरेको छ।

जिल्ला ट्राफिक प्रहरी कार्यालय कैलालीका अनुसार मुख्यमन्त्री शाहले ट्राफिक नियम उल्लङ्घन गरेको पुष्टि भएपछि प्रचलित कानुनअनुसार ५०० रुपैयाँ जरिवाना तिराइएको हो।

ट्राफिक प्रहरी प्रमुख रेशम आचार्यसहितको टोली मुख्यमन्त्री निवास पुगेर नियमअनुसार जरिवाना असुल गरेको जनाएको छ।

ट्राफिक प्रहरीले हेलमेटको प्रयोग सबै मोटरसाइकल चालकका लागि अनिवार्य रहेको उल्लेख गर्दै कानुन कार्यान्वयनमा कुनै पनि व्यक्तिलाई विशेष छुट नदिइने स्पष्ट पारेको छ।