काठमाडौँ- मलेसियाका लागि प्रस्तावित नेपाली राजदूत चुडामणि खरेलको संसदीय सुनुवाइ प्रक्रिया टुङ्गिन बाँकी रहेको छ । खरेलविरुद्ध उठेका विवादित विषयमा थप अध्ययन गर्नुपर्ने भएपछि सुनुवाइ प्रक्रिया लम्बिएको हो ।

सङ्घीय संसद्को संसदीय सुनुवाइ समितिका सभापति बोधनारायण श्रेष्ठले प्रस्तावित राजदूत खरेलसँग सम्बन्धित विवादित विषयमा थप सूचना तथा प्रमाण आवश्यक रहेकाले समितिले अध्ययनका लागि समय लिने बताए।

समितिको आजको बैठकमा खरेलको स्वार्थको द्वन्द्व, म्यानपावर व्यवसायीसँगको सम्बन्ध र पोखरामा जग्गा खरिद गर्दा अनियमितता भएको भन्ने विषयमा प्रश्न उठाइएको थियो ।

सभापति श्रेष्ठले परराष्ट्र ऐनमा राजदूतका लागि उच्च नैतिक चरित्र हुनुपर्ने व्यवस्था रहेकाले त्यससम्बन्धी विषयको अध्ययन तथा रुजु गर्न आवश्यक रहेको बताए । थप अध्ययनपछि समितिले आवश्यक निर्णय लिने र प्रक्रियामा ढिलाइ भए सचिवालयमार्फत जानकारी गराइने उनले स्पष्ट पारे।

‘आएका केही विवादास्पद विषयबारे थप जानकारी लिन हामी सबैलाई समय चाहिएको छ’, उनले भने, ‘प्रस्तावित राजदूत खरेल पनि अन्यायमा पर्नु हुँदैन र समितिले पनि विवादमा पर्नेगरी काम गर्नु हुँदैन ।’

सुनुवाइका क्रममा प्रस्तावित राजदूत खरेलले आफूविरुद्ध उठाइएका केही विषयमा स्पष्टीकरण दिने प्रयास गरेका थिए । समितिले विवादित विषयमा थप अध्ययन गरेपछि सुनुवाइ प्रक्रियाबारे निर्णय गर्ने जनाएको छ ।