काठमाडौँ– गृहमन्त्री सुधन गुरुङले बूढीगण्डकी नदी तटीय क्षेत्रका बासिन्दाहरूलाई तत्काल सुरक्षित स्थानमा स्थानान्तरण हुन र उच्च सतर्कता अपनाउन अनुरोध गरेका छन् ।

गृहमन्त्री गुरुङले नेपालले फेरि अर्को भीषण बाढीको सामना गर्नुपरेको भन्दै सावधानी अपनाउन आग्रह गरेका हुन् । उनले भनेका छन्– ‘विशेष गरी बूढीगण्डकी नदी किनार तथा तटीय क्षेत्रमा रहेका सिर्दिबास, जगत, सल्लेरी, खोलबेसी, माछाखोला, सोती, आर्खेत र आरुघाट क्षेत्रका बासिन्दाहरूलाई तत्काल सुरक्षित स्थानमा स्थानान्तरण हुन र उच्च सतर्कता अपनाउन हार्दिक अनुरोध गर्दछु।’

उनले यसपालि आफ्नै निर्वाचन क्षेत्र गोरखाको चुमनुब्री–३, न्याक्चेत र फिलिम बजार जोड्ने पुल बगेको तथा घट्टेखोला क्षेत्रका केही घरहरूमा लेदोसहितको पानी पसी नदीको बहाव निरन्तर बढिरहेको समाचार प्राप्त भएको उल्लेख गरेका छन् ।

उनले घटनालगत्तै नेपाल प्रहरी, सशस्त्र प्रहरी बल तथा स्थानीय प्रशासनलाई उद्धार, राहत र सुरक्षित स्थानमा स्थानान्तरणका लागि हेलिकप्टरहरू घटनास्थलमा परिचालन गरिसकेको पनि जनाएका छन् ।

आज बिहान करिब साढे ४ बजे गोरखाको चुमनुब्री गाउँपालिका–३ स्थित फिलिममा पहिरोका कारण थुनिएको बुढीगण्डकी नदी खुल्दा लेदो तथा गेग्रानसहितको आकस्मिक बाढी आएको थियो । उक्त बाढीले नदीको तटीय क्षेत्रमा ठूलो क्षति गरेको छ ।