काठमाडौं — चर्चित गायिका सुनिता दुलालले आफू पहिलो सन्तानको आमा बन्न लागेको संकेत दिएकी छन्। नयाँ तीज गीत ‘अब त मैले नि झुम्का लगाउँछु’ को प्रचारका क्रममा उनले श्रीमान् राजेश केसीसँग बनाएको टिकटक भिडियोमार्फत बेबी–बम्प देखाउँदै खुसीको खबर सार्वजनिक गरेकी हुन्।

साडीमा सजिएर भिडियोमा देखिएकी दुलालको पेट ठूलो देखिएपछि उनी गर्भवती रहेको चर्चा सुरु भएको हो। उनले औपचारिक रूपमा घोषणा नगरे पनि भिडियोमार्फत अप्रत्यक्ष रूपमा आफ्नो मातृत्व यात्राबारे जानकारी दिएको बुझिएको छ।

गायिका दुलालले गत मंसिरमा राजेश केसीसँग विवाह गरेकी थिइन्। विवाहपछि पहिलो सन्तानको आगमनको तयारीमा रहेकी दुलालको यो खबरले उनका शुभेच्छुकहरूबीच खुसी छाएको छ।