काठमाडौं– विश्वकै सर्वाधिक लोकप्रिय युट्युबर जिमी डोनाल्डसन (मिस्टर बिस्ट) अब वैवाहिक जीवनमा प्रवेश गरेका छन् । उनले आफ्नी लामो समयदेखिकी प्रेमिका थियन बुयसेनसँग जुलाई २१ मा विवाह गरेका हुन् ।

विवाहपछि पहिलो पटक सामाजिक सञ्जालमार्फत तस्बिर सार्वजनिक गर्दै उनले आफ्नो जीवनको सबैभन्दा विशेष क्षण प्रशंसकहरूसँग साझा गरेका छन् ।

इन्स्टाग्राममा विवाहका तस्बिर पोस्ट गर्दै मिस्टर बिस्टले भावुक सन्देश लेखेका छन्, ‘मैले मिसेस बिस्टलाई पाएँ, र त्यो मेरो जीवनकै सबैभन्दा राम्रो दिन थियो ।’ उनको यो पोस्ट सार्वजनिक भएको केही समयमै लाखौँ लाइक र शुभकामनाले भरिएको छ ।

मिस्टर बिस्ट र थियन बुयसेनले आफ्नो विवाहलाई अत्यन्त निजी र साधारण राखेका थिए । उनीहरूले केवल परिवारका सदस्य र निकट साथीभाइको उपस्थितिमा विवाह सम्पन्न गरेका हुन् । यो जोडीले डिसेम्बर २०२४ मा इन्गेजमेन्ट गरेर आफ्नो सम्बन्धलाई औपचारिक बनाएका थिए ।

मिस्टर बिस्ट आज विश्वकै सबैभन्दा धेरै पछ्याइने युट्युबरका रूपमा परिचित छन्। उनको ‘MrBeast’ नामक युट्युब च्यानलमा ५० करोडभन्दा बढी सब्सक्राइबर रहेका छन् । युट्युबको इतिहासमा यो उपलब्धि हासिल गर्ने उनी पहिलो कन्टेन्ट क्रिएटर हुन् ।

भव्य चुनौती, करोडौँ डलरका पुरस्कार, परोपकारी अभियान र मनोरञ्जनात्मक भिडियोमार्फत विश्वभर करोडौँ दर्शकको मन जितेका मिस्टर बिस्टको विवाहको खबरले अहिले सामाजिक सञ्जालमा व्यापक चर्चा बटुलेको छ। उनका प्रशंसकदेखि विश्वभरका चर्चित कन्टेन्ट क्रिएटरसम्मले नवविवाहित जोडीलाई शुभकामना दिइरहेका छन्।