काठमाडौं : राष्ट्रिय स्वतन्त्र पार्टीका सभापति रवि लामिछानेले कांग्रेस-एमालेको टार्गेटमा आफ्नो पार्टी परेको बताएका छन्।

सोमबार प्रतिनिधिसभाको विशेष समयमा बोल्दै लामिछानेले पछिल्लो समय सदनमा प्रधानमन्त्रीका साथै कांग्रेस-एमाले सांसदको अभिव्यक्ति सुन्दा रास्वपा ठूला दलको टार्गेटमा परेको आभास भएको बताए।

संसद्को पछिल्लो गतिविधिले मुलुकको लागि आवश्यक रहेको दल नै रास्वपा हो भन्ने पुष्टि हुँदै गएको उनले बताए। लामिछानेले आफू केही समय नबोलौं भनेर चुप लागेर बसेको भए पनि पछिल्लो समय सदनमा आफूमाथि लागेको आरोपबारे स्पष्ट पार्नुपर्ने अवस्था आएको बताए। भ्रष्टाचारको फाइल खुल्ने विषयमा आफूलाई जस नचाहिएको उनले बताए।