काठमाडौं : भौतिक पूर्वाधार तथा यातायात मन्त्री देवेन्द्र दाहालले विपद् पछिको पुनर्निर्माणलाई पहिलो प्राथमिकतामा राखेर काम गर्न निर्देशन दिएका छन्।

मन्त्रालयका विभागीय प्रमुख एवं आयोजना प्रमुखहरूलाई मंगलबार निर्देशन दिँदै उनले बाढी पहिरोले क्षतिग्रस्त बनाएका सडकमा आगामी वर्षायाममा समेत सवारी सञ्चालन हुने गरी काम थाल्न निर्देशन दिएका हुन्।

‘हामीले विभिन्न माइलस्टोनहरू कायम गरेका छौं, तिनको उपलब्धिबारे समीक्षा गर्नुहोला’ मन्त्री दाहालले भने, ‘अहिले सबैभन्दा बढी काम गर्ने बेला हो, यसको अधिकतम उपयोग गरी लक्ष्य हासिल तर्फ लाग्न आवश्यक छ।’

सडक एवं पुल निर्माणका लागि बाँकी ठेक्काहरूलाई लगाई सक्न सडक विभागलाई निर्देशन दिँदै उनले रूग्ण आयोजनाहरूको व्यवस्थापन तर्फ लाग्न समेत आग्रह गरे। यस्तै सवारी चालक अनुमति पत्र वितरणलाई प्रदेश स्तरबाटै प्रभावकारी बनाउन आवश्यक समन्वयका लागि यातायात व्यवस्था विभागलाई मन्त्री दाहालले निर्देशन दिए।

सम्भावनायुक्त थप नदीहरूमा पानी जहाज सञ्चालनको अध्ययनका लागि नेपाल पानी जहाज कार्यालयलाई निर्देशन दिँदै मन्त्री दाहालले समुद्रमा नेपाली पानी जहाज सञ्चालनको कानुनी व्यवस्थाका लागि मन्त्रालयले काम गरि रहेको मन्त्री दाहालले बताए। यस्तै पूर्वपश्चिम रेलमार्गका लागि अधिग्रहण गर्नुपर्ने जग्गाको मुआब्जा वितरणका लागि समेत मन्त्रालयले काम गरी रहेको उनले जनाएका छन्।