जनकपुर । सरकारी निकायमा हुने अनियमितताको सूचना माग गर्ने र पारदर्शीता चाहने अभियन्ताहरुकै संस्थाको गतिविधी नै यतिबेला अनियमित तथा अपारदर्शी भएको चर्चा भुसको आगो जसरी फैलदैं छ । सूचनाको हकका लागि राष्ट्रिय महासंघका नाममा अध्यक्ष उमीद बागचन्द परिवारको कमाउ धन्दा फस्टाउन थालेको महासंघका प्रदेश तथा जिल्ला समितिबाटै गुनासो आउन थालेको हो ।

महासंघका अध्यक्ष उमीद बागचन्द सूचनाको हकसम्बन्धी प्रशिक्षण शिविर र मधेश प्रदेशको अधिवेशन भनी जनकपुर आउँदा यस्तो तथ्य खुलेको हो । महासंघको मधेश प्रदेश समितिका एक सदस्यका अनुसार महासंघका नाममा बागचन्द दम्पत्ती प्लेन चढेर जनकपुर आएका थिए । महासंघकै पैसामा प्लेनबाट अध्यक्ष बागचन्द दम्पत्ती जनकपुर आउँदा अरु पदाधिकारी भने नदेखिएको उनले सुनाए । महासंघले आयोजना गरेको कार्यक्रममा अध्यक्ष उमीदकी श्रीमती निर्मला बागचन्दलाई पनि महिला अधिकारकर्मी भन्दै मञ्चमा राष्ट्रिय सूचना आयोगका प्रमुख आयुक्त महेन्द्रमान गुरुङसँगै राखिएको थियो ।

मधेश प्रदेशका मुख्यमन्त्री सतीशकुमार सिंहको प्रमुख आतिथ्यतामा आयोजना गरिएको उक्त कार्यक्रमले मधेश प्रदेशमा सूचनाको हकका लागि राम्रो काम गर्ने आशा गरिएकामा कार्यक्रमको स्वरुपले नै बागचन्द दम्पत्तीको घुमघाम र मस्तीका लागि कार्यक्रम आयोजना गरिए जस्तो देखिएको थियो । बागचन्द दम्पत्तीले सामाजिक सञ्जालमा पोष्ट गरेका तस्बिरले पनि घुमघाम र मोजमस्तीकै लागि जनकपुर पुगेको प्रष्ट पार्ने ती सदस्यले उल्लेख गरे । अमेरिकी जनताको सहयोगमा नेपालमा कार्यक्रम चलाइरहेको युएसएडले दिएको पैसा द एसिया फाउन्डेसनमार्फत् महासंघलाई मधेशप्रदेश र लुम्बिनीमा कार्यक्रम गर्न दिइएको जानकारी पनि कार्यक्रममा गराइएको थियो ।

मधेशप्रदेश र लुम्बिनीमा दिइएको कार्यक्रममा सूचनाको हकको चेतनाभन्दा बागचन्द परिवारको स्वार्थपूर्ति भइरहेको छ । महासंघको अध्यक्ष हुनुअघि बागचन्द बिबिसी नेपाली सेवाका लागि धनगढीबाट रिपोर्टिङ गर्ने गर्थे । पत्रकारितासँगै धनगढीमा एनजीओका नाममा डलरको ‘स्वाद’ चाखेका बागचन्दले सूचनाको हकका नाममा महासंघ खोलेर अपारदर्शी रुपमा स्वार्थपूर्ति गर्न थालेको चर्चाले जनकपुर तातिएको छ । महासंघको केन्द्रीय समितिमा उमीदका साखै भाई राजेश बागचन्द पनि केन्द्रीय सदस्य छन् । बागचन्दले अब श्रीमती निर्मलालाई पनि केन्द्रीय समितिमा राखेर पारिवारिक संस्थाका रुपमा स्थापित गर्न खोजेको हल्लाले समेत जनकपुरमा महासंघ प्रति घृणाभाव जगाएको छ ।

 मधेशप्रदेश समितिको गठन गर्दा समेत बागचन्दले आफूले चाहेका मानिसलाई राखेका थिए । मधेश प्रदेशका आठ जिल्लाबाट प्रतिनिधि बोलाइएको भनिएपनि कुनै पनि जिल्लामा अधिवेशन नभएको एक प्रतिनिधिले सुनाए । बागचन्दको खल्तीका मानिसलाई मधेशप्रदेशका आठ जिल्लाबाट बोलाएर प्रदेश अधिवेशनको प्रतिनिधि घोषणा गरिएको थियो । प्रदेश अधिवेशनअघि तिनैलाई प्रशिक्षण शिविर भन्दै जनकपुरको सीताशण होटलमा कात्तिकको ५ गतेदेखि ७ गतेसम्म राखिएको थियो ।

यसै विषयमा अध्यक्ष बागचनलाई प्रतिकृया लिँदा उनी भन्छन् – ‘पारिबारिक संस्था नभएको र  स्थापनाको सुरुवाती चरणमा रहेका छौं, संस्थामा सबै कुरा पारदर्शी छ र मधेस प्रदेश जाँदा मेरी श्रीमती निजी खर्चमा गएको हो ।’

यसै विषयमा राष्ट्रिय सूचना आयोगका प्रमुख आयुक्त गुरुङलाई प्रतिकृया लिन मोवाइलमा सम्पर्क गर्दा फोन उठेन् ।