तीव्रखबर
– पवित्रमणी शर्मा
काठमाडौँ । नेपाल महर्षि वैदिक फाउन्डेसनका अध्यक्ष दीपकप्रकाश बास्कोटाले संस्थाका ध्यान शिक्षक र कर्मचारीको तलबबाट कटाएर राखेको पैसा आफ्नो खातामा राखेर अपचलन गरेको गुनासो त्यस संस्थामा कार्यरत कर्मचारीले लगाएका छन् ।
फाउन्डेसनका बारेमा तीव्रखबर अनलाइनमा अनियमितताको समाचार सार्वजनिक गरेपछि त्यहाँ कार्यरत कर्मचारी सम्पर्कमा आई नाम नछाप्ने शर्तमा यस्तो जानकारी गराएका हुन् । पहिलोपटक समाचार सार्वजनिक भएपछि गरिएको कमेन्टमा गोपालकुमार मैनालीले पनि यस्तै लेखेका छन् । मैनाली पनि फाउन्डेसनको पूर्व ध्यान शिक्षकका रुपमा कार्यरत रहेको तीव्रखबर अनलाइनको सम्पर्कमा आएका ती कर्मचारीले नाम नछाप्ने शर्तमा जानकारी गराए ।
बास्कोटा परिवारले संस्थामा कार्यरत कर्मचारीको तलब सुविधा, गुरुकुलमा राखिएका विद्यार्थीलगायतको पैसा निजी खातामा लगी खाने गरेका छन् । फाउन्डेसनमा धेरै अनियमितता भएको विषय समाज कल्याण परिषद्मा उजुरी परेपछि छानबिन गर्न गएको टोलीलाई पनि पैसा दिएर किनेको फाउन्डेसन स्रोतले जनाएको छ ।
यसै विषयमा प्रतिकृया लिन अध्यक्ष बास्कोटाको मोवाइल नम्बरमा सम्पर्क गर्दा ‘मलाई केही पनि नसोध्नु’ भन्दै फोन राखिदिए ।
स्मरण रहोस् फाउन्डेसनमा अनियमितता भएको तथ्य उसैले पुष्टि गरेको छ । फाउन्डेसनका सूचना अधिकारीसमक्ष माग गरिएका सूचना पनि दिएका छैनन् । अनियमितता नगरेको भए सूचना दिन आपत्ति नहुनुपर्ने हो । सूचना नदिएपछि मंसिर २० गते फाउन्डेसनका कार्यालय प्रमुखलाई सम्बोधन गरी सूचना माग गरिएको छ । कार्यालय प्रमुखले सूचना दिन्छन् कि दिँदैनन्, त्यो हेर्न बाँकी छ ।
यो पनि पढ्नुहोस्
महर्षि वैदिक फाउन्डेसनमा अनियमितता : पूर्व गृहराज्यमन्त्री बास्कोटाको परिवारले गरे करोडौँ अपचलन
प्रतिक्रिया