तीव्रखबर
पोखरा । पूर्व उपप्रधान तथा गृहमन्त्री एवं राष्ट्रिय स्वतन्त्र पार्टीका सभापति रबी लामिछानेलाई म्याद थपका लागि आज आइतबार जिल्ला अदालत कास्की लगिने भएको छ ।
जिल्ला अदालत कास्कीले पक्राउका अनुमति दिएलगत्तै उनलाई शुक्रबार पार्टीको मुख्यालयबाटै पक्राउ गरेको थियो ।
रविकै आग्रह अनुसार उनलाई सडकमार्ग हुँदै शनिबार बिहान पोखरा ल्याइपुर्याइएको थियो ।
शनिबार बिदा परकाले आज उनलाई अदालतमा उपस्थित गराइने छ ।
शनिबार दिनभर रास्वपाका नेता तथा कार्यकर्ताले दिनभरजसो पोखरामा प्रदर्शन गरेका थिए । त्यसो त सहकारी पीडितले समेत पोखरामा शनिबार प्रदर्शन गरेका छन् ।
आज रविलाई अदालत लैजाने समयमा समर्थक र सहकारी पीडितहरु पनि प्रदर्शनको तयारीमा छन् ।
जिल्ला प्रशासन कार्यालय कास्कीले शनिबार बिहान सर्बदलीय बैठक डाकेर प्रदर्शनका बेला संयमित हुन र भीडभाड नगरिदिन आग्रह गरेका थिए ।
प्रजिअ भरतमणी पाण्डेले सहकारी पिडितसँग भिन्दै बैठक गरेका थिए ।
प्रजिअको आग्रह अनुसार आफूहरु संयमित भएको सहरकारी पिडित संघर्ष समिति संयोजक किरण श्रेष्ठले बताएका छन् ।
सम्भावित जोखिमलाई मध्यनजर गर्दै कास्की प्रशासनले आजका लागि सुरक्षा व्यवस्थालाई थप मजबुत बनाएको छ ।
पोखराको सूर्यदर्शन सहकारीको रकम गोर्खा मिडियामा लगेर अपचलन गरेको मुख्य आरोप लामिछानेमाथि छ ।
रवि लामिछानेको नामै किटान गरेर सहकारी पीडितले २०८० माघ २२ मा जिल्ला प्रहरी कार्यालय कास्कीमा पूरक जाहेरी दिएका थिए ।
सहकारीको रकम अपचलन र संगठित अपराध मुद्दामा अनुसन्धानका लागि उनी शुक्रबार काठमाडौंबाट पक्राउ परेका थिए ।
प्रतिक्रिया