सत्तारुढ नेपाली काँग्रेसको विद्यार्थी संगठन नेविसंघ सामाजिक सञ्जाल विधेयकविरुद्ध सडकमा ओर्लिएको छ ।

नेविसंघका नेता-कार्यकर्ताले आज अपराह्न माइतीघर मण्डलामा भेला भई विरोध प्रदर्शन गरेका हुन् । संविधानले दिएको वाक स्वतन्त्रता हनन् हुनेगरी सरकार सामाजिक सञ्जाल नियन्त्रण गर्ने प्रयासमा रहेको काँग्रेसी विद्यार्थीहरुको ठहर छ ।

प्रदर्शनका क्रममा ‘नियमन चाहिएको हो नियन्त्रण होइन’, ‘यो व्यवस्थामा बोल्न पाइन्न र?’, ‘प्रश्नसँग डराएको सरकार’, स्वतन्त्रताको सुरक्षा,अभिव्यक्तिको अधिकार’ लेखिएका प्लेकार्ड प्रदर्शन गरिएको छ ।

सरकारले कानुन बनाएर अभिव्यक्ति स्वतन्त्रता खोस्न लागेको भन्दै संसदमा दर्ता उक्त विधेयकको चर्को आलोचना भैरहेको छ । बिभिन्न राजनीतिक दल, नागरिक समाज, बुद्धिजीवीलगायत सरोकारवालाहरुको तर्फबाट विरोध भैरहँदा सरकार भने विधेयक पारित गराउने प्रयासमा देखिन्छ ।