विराटनगर  : प्रधानमन्त्री केपी शर्मा ओलीले स्टेट पार्टनरसिप प्रोग्राम (एसपीपी) सम्झौता नहुने बताएका छन् । विराटनगर विमानस्थलमा सोमबार बिहान पत्रकारले सोधेका प्रश्नको संक्षिप्त जवाफ दिँदै ओलीले एसपीपी सम्झौता नहुने बताएका हुन् । जहाजबाट ओर्लिएर गाडी चढ्ने बेलामा उनलाई पत्रकारले मुलुकको आर्थिक समृद्धि र अमेरिकाले प्रस्ताव गरेको एसपीपीका बारेमा प्रश्न गरेका थिए । जवाफमा ओलीले एसपीपी सम्झौता नहुने बताए ।

पूर्वप्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आइतबार वर्तमान सरकारले एसपीपी सम्झौता गर्न सक्ने आशंकापूर्ण अभिव्यक्ति दिएका थिए । विगतमा केपी शर्मा ओलीले सैद्धान्तिक सहमतिसमेत दिइसकेको भन्दै प्रचण्डले अब सम्झौता गर्न सक्ने आशंका गरेका हुन् । आइतबार मकवानपुरको हेटौंडामा आयोजित पत्रकार भेटघाटमा बोल्दै प्रचण्डले एमसीसीभन्दा अझ गम्भीर प्रकृतिको एसपीपी सम्झौता सरकारले गर्नसक्ने जिकिर गरेका थिए ।

तर,विराटनगर विमानस्थलमा ओलीले एसपीपी सम्झौता नहुने स्पष्ट पारेका छन् । उनले मुलुकमा आर्थिक समृद्धिको काम भइरहेको बताए । ‘मुलुकको समृद्धिका लागि हामी काम गर्दैछौं,’उनले भने । त्यसपछि ओलीले थप प्रतिक्रिया दिन चाहेनन् ।

उनले विराटनगर विमानस्थलमा पत्रकारहरूसँग लामो कुराकानी गर्न पनि चाहेनन् । बुद्ध एयरको जहाजबाट करिब ११ बजे विमानस्थलमा अवतरण भएका ओलीले पत्रकारसँग लामो कुरा गर्न मानेनन् । यसअघि प्रधानमन्त्रीलगायत विशिष्टहरु आउँदा विमानस्थलको भीआईपी कक्षमा पत्रकारहरुसँग समसामयिक विषयमा कुरा गर्ने गर्थे ।

तर,आज (सोमबार) ओली आउँदा भने पत्रकारलाई भीआईपी कक्षमा प्रवेश निषेध गरियो । प्रहरीले बाहिरै रोकेर राखेको थियो । ओली आउने खबर सुनेपछि प्रतिक्रिया लिनका लागि पत्रकारहरु विमानस्थल पुगेका थिए । बेलुका काठमाडौं फर्किंदा कुरा गर्ने भन्दै उनी विराटनगरको होटल ह्यारिसनतिर लागे । ओलीको स्वागत एवं सुरक्षाका लागि भनेर २५ वटाभन्दा बढी अगुवा पछुवा गाडीको लाम लागेको थियो ।

उनी केहीबेर होटल ह्यारिसमा आराम गरेर सुनसरीको धरानतिर जाने कार्यक्रम छ । उक्त होटल उद्योगी एवं एमाले नेता मोती दुगडको हो । ओली विराटनगर आउँदा प्राय यही होटल प्रयोग गर्छन् । प्रधानमन्त्री आउने भएपछि विराटनगर र आसपासको सुरक्षा व्यवस्था कडा पारिएको थियो ।

ओली सुनसरीको धरान जाने कार्यक्रम छ । बिपी कोइराला स्वास्थ्य विज्ञान प्रतिष्ठानको १३ औं दीक्षान्त समारोहमा सहभागी हुन उनी पूर्व आएका हुन् । उनी आजै अपरान्ह विराटनगर विमानस्थल हुँदै काठमाडौं फर्किने कार्यक्रम रहेको सुरक्षा स्रोतले बतायो ।