काठमाडौं : साउदी अरबबाट स्वदेश फर्किएका एक नेपाली युवामा मंकीपक्स संक्रमण भएको शुक्रबार पुष्टि भएको छ। नेपालीलाई मंकीपक्स (एमपक्स) संक्रमण भएको यो पहिलो हो।

स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीका अनुसार, तनहुँका ३६ वर्षीय युवामा संक्रमण पुष्टि भएको हो। बिहीबार स्वदेश फर्किएका ती युवा बिसञ्चो महसुस भएपछि विमानस्थलबाट सिधैं निजी अस्पताल पुगेका थिए। उनलाई सामान्य ज्वरो देखिएको छ। मन्त्रालयका प्रवक्ता डा. बुढाथोकीले विदेशबाट आएका युवामा संक्रमण पुष्टि भएकाले नेपालभित्रै यो रोगको संक्रमण भएको छ-छैन यकिन छैन।

संक्रमित युवाको शुक्रराज ट्रपिकल तथा सरुवा रोग अस्पतालमा आइसोलेसनमा राखेर उपचार भइरहेको छ। दुई वर्षअघि नेपालमा रहेकी विदेशी नागरिकमा पनि मंकी पक्स संक्रमण पुष्टि भएको थियो। मंकीपक्स भाइरसबाट हुने एक किसिमको सरुवा रोग हो। एमपक्स मानिसबाट मानिसमा वा जनावरबाट मानिसमा सर्ने गर्छ।मंकीपक्सको संक्रमणको घटना पुष्टि भए पछि त्रिभुवन विमानस्थल र अन्य हेल्थ डेस्कमा सतर्कता अपनाउन निर्देशन दिइएको डा. बुढाथोकीले बताए।