काठमाडौं / सतुङ्गलमा बस्दै आएकी धादिङकी एउटी किशोरीको हत्यामा संलग्न अभियुक्त फेला परेका छन् । खरिबोटस्थित वीरेन्द्र श्रेष्ठको घरमा भाडामा बसेर बिष्णु देवी शिक्षा सदन माध्यमिक विद्यालय नैकापमा कक्षा १० मा अध्ययनरत १७ वर्षीया सरिता तामाङको आफ्नै कोठामा शव फेला परेपछि अभियुक्तको रुपमा प्रहरीले २४ वर्षे विश्वास तामाङलाई नियन्त्रणमा लिएको बताइएको छ ।

धादिङको गजुरी गाउँपालिका वडा नम्बर ४ घर भएकी किशोरी सरिता मंसिर २९ गते रातिदेखि हराएको भनिएको थियो । उनका दाजु नवीन रुम्बा तामाङले पुस १ गते बहिनी गत शनिबार मध्यरातदेखि हराएकाले हुलियासहित प्रहरीमा निवेदन दिएका थिए ।

प्रहरी परिसर काठमाडौं र मातहत कार्यालयको पहलमा गरिएको खोजतलासमा किशोरीको शव हिजो दिउँसो ३ बजे उनकै कोठाको लोबेडमा फेला परेको हो । त्यसपछि प्रहरीले काठमाडौं १४, खड्कागाउँस्थित डेरामा बस्दै आएका विश्वासलाई हिजो राति उनकै कोठाबाट नियन्त्रणमा लिएको थियो ।

अभियुक्तको स्थायी ठेगाना गजुरी गाउँपालिका वडा नम्बर ३ भएको बताइन्छ । उनको साथबाट प्रहरीले मृतकको मोबाइल सेट एक थान पनि फेला पारेको छ ।