काठमाडौं,  : दार्चुला, शैल्यशिखर नगरपालिका-६ बजानीस्थित सडकमा मालिकार्जुनबाट गोकुलेश्वरतर्फ जाँदै गरेको म.१ ज ३३८ नम्बरको जिप अनियन्त्रित भई सडकबाट अन्दाजी २ सय मिटर तल खसेर शुक्रबार बिहान दुर्घटना हुँदा जिपमा सवार ८ जनाको मृत्यु भएको छ ।

दुर्घटनामा ६ जनाको घटनास्थलमै र गम्भीर घाइते भएका २ जनाको गोकुलेश्वर अस्पतालमा उपचारको क्रममा मृत्यु भएको हो ।

साथै दुर्घटनामा घाइते भएका जिपमा सवार ४ जनाको सोही अस्पतालमा उपचार भइरहेको छ ।

काठमाडौं, काठमाडौं महानगरपालिका-१६ गंगाहल नजिक सडकमा सु.प.प्र.०२-००१ ख १३३० नम्बरको बस र प्रदेश ३-०२-००७ प ७६१० नम्बरको मोटरसाइकल एकआपसमा ठक्कर खाई बिहीबार बेलुकी दुर्घटना हुँदा मोटरसाइकल चालक काठमाडौं महानगरपालिका-१६ माछापोखरी बस्ने १८ वर्षीय युनिक खड्काको मृत्यु भएको छ ।

दुर्घटनामा गम्भीर घाइते भएका उनको त्रिवि शिक्षण अस्पताल महाराजगंजमा उपचारको क्रममा मृत्यु भएको हो ।

साथै दुर्घटनामा घाइते भएका मोटरसाइकलमा सवार १ जनाको हेम्स अस्पताल धुम्बाराहीमा उपचार भइरहेको छ । बस चालकलाई प्रहरीले नियन्त्रणमा लिएको छ ।

काभ्रे, पाँचखाल नगरपालिका-१३ रोटेपिङडाँडास्थित सडकमा बा.५ ख २२०२ नम्बरको निशान गाडी अनियन्त्रित भई सडकबाट करिब २ सय मिटर तल खसेर बिहीबार साँझ दुर्घटना हुँदा चालक पाँचखाल नगरपालिका-१३ बस्ने ३५ वर्षीय कुमार रोक्का र सहचालक सोही ठाउँ बस्ने २६ वर्षीय माईला रोक्काको मृत्यु भएको छ ।

दुर्घटनामा गम्भीर घाइते भएका उनीहरूको  धुलिखेल अस्पतालमा उपचारको क्रममा मृत्यु भएको हो ।

उदयपुर, रौतामाइ गाउँपालिका-१ डहरस्थित सडकमा प्रदेश ०३-००१ त ८१९० नम्बरको ट्याक्टर अनियन्त्रित भई बिहीबार राति दुर्घटना हुँदा ट्याक्टरमा सवार सोही गाउँपालिका-१ डहर बस्ने ४० वर्षीय चक्र बहादुर तामाङको घटनास्थलमै मृत्यु भएको छ । हाल फरार ट्याक्टर चालकको प्रहरीले खोजी गरिरहेको छ ।

बारा, प्रसौनी गाउँपालिका-२ दुधैरापुलस्थित सडकमा कलैयाबाट वीरगंजतर्फ जाँदै गरेको बा.प्र.०१-०३० च ९७५७ नम्बरको गाडीले ठेलालाई ठक्कर दिँदा ठेलामा सवार हाल नाम, थर, वतन नखुलेका १ जना पुरूषको मृत्यु भएको छ ।

बिहीबार राति भएको उक्त दुर्घटनामा गम्भीर घाइते भएका उनको एलएस न्यूरो अस्पताल परवानीपुरमा उपचारको क्रममा शुक्रबार बिहान मृत्यु भएको हो । साथै दुर्घटनामा घाइते भएका ठेलामा सवार १ जनाको सोही अस्पतालमा उपचार भइरहेको छ ।

प्रहरीले हाल फरार गाडी चालकको खोजी गरिरहेको छ । दुर्घटनाको सम्बन्धमा प्रहरीले आवश्यक अनुसन्धान गरिरहेको छ ।