विराटनगर।सहकारी घोटालामा मुछिएकी संसद्को सार्वजनिक लेखा समिति सभापति ऋषिकेश पोखरेलकी पत्नी अञ्जला कोइराला धरौटीमा रिहा भएकी छन् । जिल्ला अदालत मोरङका न्यायाधीश उद्धवप्रसाद भट्टराईको एकल इजलासले उनलाई १० लाख रुपैयाँ धरौटीमा छाड्न आदेश दिएको छ ।

अदालतका तहसिलदार हरिप्रसाद गुरागाईंका अनुसार कोइराला धरौटी रकम तिरेर रिहा भइसकेकी छन् । प्रहरीले पक्राउ पुर्जी जारी गरेलगत्तै फरार उनी आज बिहान कार्यालय खुलेपछि अदालतमा हाजिर भएकी थिइन् ।

मोरङको धनपालथान–४ मा रहेको उमागौरी कृषि सहकारीको रकम हिनामिना गरेको अभियोगमा अञ्जलासहित २६ जनाविरुद्ध अदालतमा मुद्दा विचाराधीन छ ।

यसअघि पक्राउ परेका सहकारीका पूर्व उपाध्यक्ष तथा रंगेली नगरपालिका वडा नम्बर २ का वडाध्यक्ष सन्तलाल खवास यसअघि पाँच लाख रुपैयाँ धरौटीमा रिहा भइसकेका छन् । सहकारी सञ्चालक समितिकी सदस्य रहेकी अञ्जनाकै योजनमा विभिन्न बैंक तथा वित्तीय संस्थाबाट झण्डै साढे ११ करोड ऋण लिएको प्रहरी अनुसन्धानमा देखिएको बताइन्छ ।

रकम हिनामिनामा आफ्नो कुनै संग्लनता नरहेको अञ्जलाको दाबी छ । सभापति पोखरेलले पनि श्रीमतीलाई जोगाउन सबै दोष अध्यक्ष रौनियारमाथि लगाउँदै आएका छन् ।