भैरहवा– सहकारी ठगीसम्बन्धी कसुरमा गत कात्तिक २ गते काठमाडौंबाट पक्राउ परेका राष्ट्रिय स्वतन्त्र पार्टीका सभापति रवि लामिछानेको बयान तेस्रो दिन पनि भैरहवामा जारी छ ।

बुटवलस्थित सुप्रिम सहकारी संस्थाको बचत रकम हिनामिना अभियोगमा जिल्ला अदालत रुपन्देहीबाट पक्राउ पुर्जी जारी भएका पूर्व गृहमन्त्री लामिछानेलाई बिहीबार पनि सदरमुकाम भैरहवास्थित सरकारी वकिलको कार्यालयमा उपस्थित गराएर बयान लिइएको हो । रविको बयान सुरक्षा अधिकारीसहितको उपस्थितिमा मंगलबारदेखि चलिरहेको छ ।

सहकारी ठगी, सङ्गठित अपराध तथा सम्पत्ति शुद्धीकरणको मुद्दामा पक्राउ परेका लामिछानेलाई तेस्रो दिन पनि बाक्लो सुरक्षाबीच जिल्ला सरकारी वकिलको कार्यालयमा बिहान साढे १० बजे बयान गराउन लगिएको हो ।

भैरहवास्थित जिल्ला प्रहरी कार्यालयको हिरासतमा रहेका लामिछानेलाई मंगलबार पहिलो दिन प्रारम्भिक बयानका क्रममा ३ घण्टा ३५ मिनेट सोधपुछ गरिएको थियो ।दोस्रो दिन बिहान सवा १० बजेदेखि साँझ सवा ७ बजेसम्म ९ घण्टा बयान गराइएको थियो । तर दुई दिनमा पनि सवाल-जवाफ नसकिएकोले बिहीबार बयानका लागि लगिएको हो । बिहीबार नै बयानको अन्तिम टुङ्गो लगाउन योजना अभियोजन पक्षको छ ।

रुपन्देहीका प्रमुख जिल्ला न्यायधिवक्ता प्रेमराज पौडेलले मुलकुी फौजदारी कार्याव्यवस्थाको दफा १६ मा अनुसन्धान अधिकारीले सरकारी वकिलसमक्ष बयान लिने व्यवस्था अनुरुप अनुसन्धान अधिकारीले उपस्थित गराएका बताएका छन् ।

‘बुधबारसम्मको बयानको अन्तिम रुप दिँदै रुजु गर्ने र रोलक्रम गर्ने काम बिहीबार हुनेछ’, उनले भने, ‘उहाँविरुद्ध परेको सहकारी ठगीको कसुरमै केन्द्रित भएर सवाल-जवाफ भएका छन् । उहाँ (रवि) को सहमतिमै सहज रुपमा जवाफ आइरहेको छ । कतिवटा प्रश्न गरिएको भन्ने यकिन भएको छैन, सम्भवः आज बयान सकिन सक्छ ।’

मुलुकी फौजदारी कार्यविधि संहिताको दफा ३१ ले प्रहरीले अनुसन्धान गरेपछि प्रतिवेदन सरकारी वकिलको कार्यालयमा पठाउँछ । अनुसन्धान पूरा भएको नदेखिएको अवस्थामा थप अनुसन्धान गर्नुपरेमा वा मुद्दाको बीचमा थप बयान लिनुपर्ने देखिएमा लिन सक्ने व्यवस्था पनि छ । त्यो कानुन टेकेर अवस्था हेरेर फेरि बयान लिन सकिने व्यवस्था कानुनमा छ ।

सरकारी वकिलको कार्यालयमा ठूलो संख्यामा प्रहरी अधिकृतहरू नै खटिएर प्रहरीको घेरामा नै बयान कक्ष सम्म पुर्‍याइएको छ ।

मंगलबार बयानपछि बाहिर निस्कने क्रममा सरकारी वकिलको कार्यालय परिसरमै ‘खोरमा बाघलाई थुन्दैमा स्याल हुँदैन’ भन्ने प्रतिक्रिया दिएपछि प्रशासनलाई चुनौती थपिएको छ ।

केही बोलिहाल्ने भन्ने डरले लामिछानेलाई छेकेर सरकारी वाकिलको कार्यालय र हिरासतसम्मको यात्रा भइरहेको छ । दर्जनौँ नेपाल प्रहरी र सशस्त्र प्रहरीको घेरामा मात्रै उनलाई सरकारी वकिलको कार्यालयमा लगिएको छ । आज बयान सकिए साँझसम्म उनलाई रुपन्देहीबाट पोखरा पठाइने छ ।

रास्वपाका कार्यकर्ताहरूले लामिछाने रुपन्देही आएदेखि नै उनको समर्थनमा विरोध गरेका छन् । त्यही क्रममा बुधबार दिउँसो अदालतअगाडि कार्यकर्ता प्रवेश गर्न खोज्दा सुरक्षाकर्मीसँग केहीबेर तनाव भएको थियो । बिहीबार पनि रास्वपाले रुपन्देहीमा मोटरसाइकल र्‍याली निकाल्दैछ ।