जनकपुरधाम – जनकपुरधामस्थित रामस्वरुप रामसागर बहुमुखी (राराव) क्याम्पसमा अध्ययनरत विद्यार्थीहरू परीक्षा केन्द्र अन्य क्याम्पसमा कायम गरिएको भन्दै आन्दोलित भएका छन् । स्नातक तहको पहिलो सेमेस्टरको परीक्षा पुस १७ गतेदेखि हुन लागेको छ ।

सोही तहमा रारावमा अध्ययनरत केहीको परीक्षा केन्द्र रारावमा राखिएको र केहीको नराखिएको भन्दै विद्यार्थीहरू आन्दोलित भएका हुन् ।

आन्दोलित विद्यार्थीहरूले क्याम्पस प्रशासनको कक्षमा तालाबन्दी गरेका छन्‌ । उनीहरूले क्याम्पस प्रशासनविरुद्ध चर्को नाराबाजी पनि गरिरहेका छन् ।

विद्यार्थीको आक्रोश जायज रहेको क्याम्पसको स्वतन्त्र विद्यार्थी यूनियन (स्ववियू) का सभापति मनिष यादवले बताए । रारावमा पहिलेदेखि नै होमसेन्टर रहेकोमा हाल परीक्षा केन्द्रबारे गलत निर्णय गरेको यादवले जारी गरेको प्रेस विज्ञप्तिमा उल्लेख छ ।

स्ववियु सभापति यादवका अनुसार रारावको क्याम्पसको परीक्षा केन्द्र जनकपुरधामको मोडेल मल्टिपल कलेज, पब्लिक युथ क्याम्पस र राजर्षि जनक क्याम्पसमा तोकिएको छ ।

परीक्षा केन्द्रलाई लिएर हुने कुनै किसिमको क्षतिको जिम्मेवार विद्यार्थीहरू नभइ क्याम्पस प्रशासन, केन्द्रीय कार्यालय तथा परीक्षा नियन्त्रकको कार्यालय हुने उनले चेतावनी दिए ।