चितवन, 
नेकपा (एकीकृत समाजवादी) का उपाध्यक्ष जगन्नाथ खतिवडाले वर्तमान सरकार कुनै पनि बेला ढल्न सक्ने चेतावनी दिएका छन्। सोमबार कटारीमा आयोजित पत्रकार सम्मेलनमा बोल्दै उनले सरकार अस्थिर रहेको र राजनीतिक सौदाबाजीको भरमा टिकेको दाबी गरे।

उपाध्यक्ष खतिवडाले कांग्रेस र एमालेबीचको सौदाबाजीमा आधारित सरकार टिकाउ नभएको बताए। उनका अनुसार यो सरकार भ्रष्टाचारका काण्डमा संलग्न व्यक्तिहरूलाई जोगाउन गठन भएको हो। उनले भुटानी शरणार्थी प्रकरण, गिरीबन्धुलगायतका काण्डमा मुछिएका व्यक्तिहरूलाई बचाउनका लागि कांग्रेस र एमालेले रातारात सरकार बनाएको आरोप लगाए।खतिवडाले एकीकृत समाजवादीले सरकार ढाल्ने कुनै योजना नभएको स्पष्ट पारे। तर, सरकार ढाल्नका लागि कसैले कदम चालेमा आफूहरूले सहयोग गर्ने संकेत गरे। उदयपुर निर्वाचन क्षेत्र-२ मा दुई दिनअघि सम्पन्न कार्यकर्ता भेलामा हृदयविक्रम तामाङको संयोजकत्वमा २१ सदस्यीय क्षेत्रीय कमिटी गठन गरिएको खतिवडाले जानकारी दिए। उनले अब जनताको समस्याको पहिचान गरी समाधानका लागि घरदैलो कार्यक्रम सञ्चालन गरिने बताए।