काठमाडौं– राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले मुलुक महाशक्ति राष्ट्रहरूको रणनीतिक क्रिडास्थल बन्ने खतरा रहेको टिप्पणी गरेका छन् ।

राप्रपा नेपालको राजनीतिक विभागले आयोजना गरेको स्वर्गीय राजा वीरेन्द्रको बहुआयामिक व्यक्तित्व विषयक विचार गोष्ठीमा बोल्दै थापाले देशका सबै क्षेत्र लथालिङ्ग र भताभुङ्ग भएको दुरावस्थाको फाइदा उठाउँदै विदेशी दबाब र प्रभाव बढ्न थालेको जिकिर गरेका छन् ।

लोकतन्त्रको आवरणमा ब्रम्हलुट भइरहेको चर्चा गर्दै थापाले आर्थिक सङ्कट, भ्रष्टाचार, बेरोजगार, धर्म परिवर्तन लगायतका विषय अहिलेको डरलाग्दो महारोग बनेको समेत बताएका छन् । राष्ट्रवादी शक्तिहरू एकजुट भएर व्यवस्था र अवस्था बदल्न लाग्नुपर्नेमा उनको जोड थियो ।

सो अवसरमा नेकपा मालेका महासचिव सीपी मैनालीले देश जोगाउन राष्ट्रियताको संरक्षण गर्न अब सबै बिउँझनुपर्ने बताए । उनले स्वार्थका लागि विदेशी हैकम सहनेहरू राष्ट्रवादी देशभक्त हुन नसक्ने बताए ।कार्यक्रममा राप्रपाका नेता हरिबहादुर बस्नेत, पूर्वमन्त्री दीपक ज्ञवालीले स्वर्गीय राजा वीरेन्द्रको व्यक्तित्वको बारेमा चर्चा गरेका थिए ।