काठमाडौं : नेपाली कांग्रेसका महामन्त्री गगन थापाले संविधान संशोधनको प्रक्रिया सुरु भइसकेकोले भ्रम नछर्न आग्रह गरेका छन्। शनिबार विराटनगरमा नेपाली कांग्रेस कोशीको प्रथम प्रदेश सम्मेलनको उद्घाटन कार्यक्रमलाई सम्बोधन गर्दै थापाले कांग्रेस र एमालेबीचको गठबन्धन मुलुकको लागि गरिएको बताएका हुन्।

सरकारले विधिको शासन कायम गर्न लाग्नुपर्ने उनको भनाई छ। उनले अपराध र भ्रष्टाचार गर्ने जो कोहीलाई कारबाहीको दायरामा ल्याउनै पर्ने बताए। थापाले बीआरआईको सम्झौताबारे अनावश्यक भ्रम र आक्षेप आएकाले संसदमा लगेर छलफल गराउनुपर्ने धारणा राखे।

नेपाली कांग्रेस कोशी प्रदेश समितिले आयोजना गरेको सम्मेलनमा सहभागी केन्द्रीय नेताहरूले पार्टीलाई एक जुट र एकतावद्ध बनाउन सबैले आ-आफ्नो तहबाट प्रयास गर्नुपर्ने जिकिर गरेका थिए। अहिले पनि पार्टीभित्र गुट उपगुटको झगडा रहेकाले नेतृत्वले पार्टीलाई एकताबद्ध बनाउन योजना ल्याउनुपर्ने बताएका थिए।