काठमाडौं – हाकिम र गायक ब्रिजेश श्रेष्ठले संयुक्त स्वर दिएको र्‍याप गीत ‘चिसो चिसो हावाले’ सार्वजनिक भएको छ ।

काठमाडौँस्थित जमलको एक हलमा बिहीबार एक कार्यक्रमको आयोजना गरी उनीहरुले गीत सार्वजनिक गरेका हुन् । गीतको भिडियोमा ब्रिजेश, हाकिम, मोडल युकी, एलिस बहादुर सिंहलगायतले अभिनय गरेका छन् ।

हाकिमले र्‍यापरहरुको जमघटको उद्देश्यले औपचारिक कार्यक्रम गरी गीत सार्वजनिक गरेको बताए ।

उनले भने, ‘हाम्रोमा एकैपटक विभिन्न प्लाल्टफर्ममा सार्वजनिक गर्ने प्रचलन छ । आर्थिक कारणले त्यस्तो भएको पाइन्छ । तर, यसरी सानै भएपनि कार्यक्रम गर्दा भेटघाटसँगै आत्मियता बढ्छ । एकअर्कासँग सहकार्य गर्ने माहोल बन्छ ।’

गीत सार्वजनिक समारोहमा उपस्थित रहेका र्‍यापर गिरिश खतिवडाले र्‍यापको माहोल राम्रो बनिरहेको देख्दा खुसी लागेको बताए ।

‘यसरी र्‍यापर अगाडी आएर आफूलाई चिनाउदै गीत सार्वजनिक गर्दा निकै खुसी लाग्छ । यो गीत अडियो र भिडियो पनि राम्रो बनेको छ । यस्तै कार्यक्रम गरेर यस्ता गतिविधि बढाउनु पर्छ । अहिलेको नयाँ पुस्ताले समेत र्‍यापलाई राम्रोसँग अगाडी बढाएको देख्दा खुसी छु,’  गरिशले भने ।
कार्यक्रमको अथितिका रुपमा र्‍यापर मानस घले पनि उपस्थिति थिए । उनले पनि उक्त गीतलाई सफलताको शुभकामना दिए ।https://youtu.be/vKI89dSndl0