वीरेन्द्रनगर । दैलेखबाट सुर्खेत आउँदै गरेको फोर्स गाडी रानीमत्तामा दुर्घटना हुँदा चार जनाको मृत्यु भएको छ भने १३ जना घाइते भएका छन् ।देउती नागरिकको कर्णाली प्रदेश ०२००१ ख ०९९८ नम्बरको फोर्स गाडी आज दिउँसो दुर्घटनामा परेको जिल्ला प्रहरी कार्यालय सुर्खेतका डीएसपी वीरेन्द्रवीर विश्वकर्माले जानकारी दिए ।

प्रहरीले दुर्घटनामा परेका यात्रुहरूको उद्धार गरिरहेको छ । मृत्यु हुनेहरूको सनाखत भइसकेको छैन । १३ जना घाइतेलाई उद्धार गरी उपचारका लागि प्रादेशिक अस्पताल वीरेन्द्रनगर ल्याइएको छ ।सो गाडी सडकभन्दा झण्डै दुई सय मिटर भिरमा खसेकाले यकिन विवरण संकलन गर्न नसकिएको प्रहरीले जनाएको छ ।प्रहरीका अनुसार १३ जना घाइतेको उद्दार गरी गुराँस गाउँपालिकाको एम्बुलेन्समार्फत कर्णाली प्रदेश अस्तालत सुर्खेत पठाएको छ । गाडीमा ३० देखि ३५ जना यात्रु रहेको अनुमान गरिएको छ ।