वासिङटन डिसी : अमेरिकी राष्ट्रपतिको चुनाव जितेपछि डोनाल्ड ट्रम्पले रुसी राष्ट्रपति भ्लादिमिर पुटिनसँग वार्ता गर्न तयार रहेको बताएका छन् । ‘मलाई लाग्छ हामी वार्ता गर्नेछौं।’, उनले भने।

डोनाल्ड ट्रम्पले आफ्नो कुराकानीमा पुटिनसँग अहिलेसम्म वार्ता नगरेको बताएका छन्। उनले दुईपक्षबीच बातचित हुने सम्भावना रहेको भने बताएका छन्।

ट्रम्पले अहिलेसम्म भ्लादिमिर जेलेन्स्की र इजरायली प्रधानमन्त्री बिन्यामिन नेतान्याहु लगायत विश्वभरका ७० नेताहरूसँग कुरा गरिसकेका छन्।

ट्रम्पले आफू र बाइडेनबीच चाँडै नै सँगै डिनर गर्ने सहमति भएको पनि बताए।

सन् २०१६ मा पनि राष्ट्रपति चुनावमा डोनाल्ड ट्रम्पको अभियानलाई बढावा दिन रुसी हस्तक्षेप भएको आरोप लागेको थियो । तर रुसले भने ती आरोप अस्वीकार गरेको छ ।

अमेरिकी विशेष सल्लाहकार रोबर्ट मुलरले २०१६ मा ट्रम्पको अभियानमा रुसको साँठगाँठको आरोपको अनुसन्धान गरेका थिए। त्यसको तीन वर्ष पछि एक रिपोर्टमा उनले षड्यन्त्रको कुनै प्रमाण फेला नपरेको बताएका थिए। बीबीसी