काठमाडौं । प्रहरी प्रधान कार्यालयले इन्सपेक्टरदेखि एसपीसम्मको सरुवा तयारी गरिरहेको छ ।

केहि जिल्ला प्रमुख एसपी,डिएसपी सहित इन्सपेक्टरहरु समेत सरुवा हुने भएपछि रस्साकस्सी मच्चिएको हो । कार्य अवधि पुगेका कार्यालयमा इन्चार्जहरुको सरुवा हुने खबरसँगै शक्ती केन्द्र धाउने होडबाजी पनि मच्चिएको छ ।

एसपी प्रमुख रहेका कास्की, दाङ,मकवानपुर,डोटी,सुनसरी, कपिलवस्तु, सप्तरीमा जान चर्को प्रतिस्पर्धा चलेको छ । कतिपय जिल्लामा एसपीहरु समेत कमाउ धन्दामा तल्लिन भएकाले अन्य जिल्ला प्रमुखहरु समेत सरुवा हुने संभावना बढेको छ ।

त्यसैगरि डिएसपी प्रमुख रहने जिल्लामा पनि उस्तै दौड चलेको छ । डिएसपी सरुवामा विभिन्न जिल्ला सहित उपत्यकाका वृत्त र इप्रकाहरु रहेकाछन् ।

डिएसपीसँगै इन्सपेक्टरहरु पनि सरुवा हुने भने पनि शक्ती केन्द्र मार्फत प्रहरी हेडक्वाटर नक्सालमा दबाब दिने क्रम बढेको हो ।

काठमाडौंका केहि वृत्त इन्चार्ज सहित डिएसपी प्रमुख रहने संखुवासभा, खोटाङ, अर्घाखाची,कालिकोट,मुगु,प्यूठान, पर्वत,मुस्ताङ,जुम्ला,दार्चुला,बैतडी,डडेलधुरा,बाजुरा लगायत जिल्ला प्रमुखहरु सरुवा हुने सुचीमा रहेकाछन् ।