माडी पुग्ने पर्यटकको रोजाइमा मगर ‘होमस्टे’

24

– नारायण अधिकारी 

चितवन, जिल्लाको दक्षिणी क्षेत्रमा पर्ने माडीमा पुग्ने पर्यटकको रोजाइमा त्यहाँ रहेको घरबास (होमस्टे) हुने गरेको छ । माडी नगरपालिका वडा नं ८ मा रहेको अयोध्यापुरी मध्यवर्ती सामुदायिक होमस्टे (मगर होमस्टे) ११ घरपरिवारले सञ्चालन गर्दै आएका छन् । 

परम्परागत खानासँगै संस्कृति र कलाको आनन्द त्यहाँको घरबासमा लिन सकिन्छ । सो क्षेत्रमा रहेका निजी होटलको भन्दा कम खर्चमा राम्रो सुविधा पाउने भएपछि माडी छिर्नेहरु त्यहाँको घरबासमा आकर्षित हुने गरेका छन् । होमस्टे व्यवस्थापन समितिका अध्यक्ष मोहनबहादुर पुनमगरका अनुसार एउटा घरमा दुई वटा कोठामा तीन जनाका दरले छ जना बस्न सक्ने क्षमता रहेको छ । सबै कोठामा सँगै शौचालय, तातोपानी जस्ता आवश्यक सुविधा रहेका छन् । 

पर्यटकीय दृष्टिले प्रचुर सम्भावना बोकेको माडी क्षेत्र निकुञ्ज र चुरे पहाडको बीचमा पर्दछ । प्राकृतिक सुन्दरतासँगै धार्मिक र कृषि क्षेत्रको अवलोकन गर्न पनि यहाँ पर्यटक आउने गर्दछन् । विसं २०७२ मा शुरु भएको घरबासको बीच भागमा ठूलो सामुदायिक भवन रहेको छ । जहाँ मगर जातिको पहिचान झल्कने सांस्कृतिक कार्यक्रम देखाइन्छ । ठूलो समूहमा पाहुनाको उपस्थिति हुँदा खाना पकाउने व्यवस्थासमेत सामुदायिक भवनमै हुने मगरले बताउनुभयो । 

अध्यक्ष मगरले पाहुना धेरै आएपछि उत्साहित हुँदै भन्नुभयो, “हालसम्म हामीले १० हजार ४०० पाहुनाको स्वागत गरिसकेका छौँ ।” घरबासमा आउनेलाई मगर समुदायले फूलमालाले स्वागत गर्ने गर्दछन् । उहाँका अनुसार देशैभरबाट घरबासमा पाहुना आउन थालेका छन् । माडी छिर्ने पर्यटक निजी होटल छोडेर घरबासमा बस्ने गरेको मगरको भनाइ थियो । 

साविक अयोध्यापुरी गाविसका अध्यक्ष पूर्णभद्र पनेरु यहाँ आउने पर्यटकको बसाइँको पहिलो छनोट अयोध्यापुरी मध्यवर्ती सामुदायिक घरबास बन्ने गरेको बताउनुहुन्छ । म्याग्दी, पर्वतबाट बसाइँ सरी यहाँ आएका पुनमगर समुदायको घरबासमा सोरठी, मारुनीसमेतको आनन्द लिन पाइन्छ । पर्या–पर्यटनसँगै धार्मिकरुपमा वैकुण्ठ ताल हेर्न आउने पनि यहीको घरबास पुग्छन् । 

शुरुमा अयोध्यापुरी मध्यवर्ती बचत तथा ऋण सहकारी संस्थाले एउटा घरबासलाई रु तीन लाखका दरले बिनाधितो ऋण दिएर शुरु गरिएको हो । सो सहकारीका अध्यक्षसमेत रहनुभएका पनेरुका अनुसार घरबास सञ्चालन गर्नेलाई तालीमसमेत दिइएको छ । पछि तराई भूपरिधि कार्यक्रम (ताल) ले स्तरोन्नतिका लागि आर्थिक सहयोग गरेको छ । तालले एक परिवारलाई घरबास व्यवस्थित गर्न रु दुई लाख ५० हजार हाराहारी खर्च गरेको पनेरुले जानकारी दिनुभयो । व्यवस्थित पलङ, कोठाको सजावट, शौचालय, तातोपानी लगायतमा तालले सहयोग गरेको हो । 

घरबासमा हालै मात्र नेपालका लागि अष्ट्रेलियन राजदूतले भ्रमण गरी आवश्यक सहयोग गर्ने प्रतिबद्धतासमेत व्यक्त गरेको अध्यक्ष मगरले बताउनुभयो । घरबास सञ्चालक तुलबहादुर पुन मगर बजारको भन्दा सस्तो र सुलभ मूल्यमा खान, बस्न पाउने भएपछि पर्यटक आउने गरेको बताउनुहुन्छ । बजारमा कोठाको रु एक हजारदेखि रु एक हजार ५०० सम्म पर्ने भए पनि घरबासमा रु ६०० मा बस्न पाइने उहाँले बताउनुभयो । खानामा पनि बजारको भन्दा सस्तो मूल्यमा खुवाउने उहाँको भनाइ थियो । 

उहाँले भन्नुभयो, “बजारमा बस्नुभन्दा घरबासमा बस्नु सस्तो र खाना स्वस्थकर भएकाले पर्यटकको आगमन बढेको छ ।” घरायसी काम गरेर घरबासबाट मात्रै रु ३० देखि ३५ हजारसम्म मासिक कमाई हुँदै आएको मगरले बताउनुभयो । घरबासमा रु २५० मा खाना खुवाउने गरिएको छ । घरमै पालेका स्थानीय जातको हाँस, कुखुराको मासु खुवाईन्छ । घरबासका लागि दुई जनालाई स्थानीय जातको कुखुरा पाल्न र दुई जनालाई तरकारी खेती गर्नसमेत सहयोग गरिएको छ । 

Facebook Comments

LEAVE A REPLY