क्यानबेर्रा । आगोले डढेर झुर्रिएको एक टुक्रा विमानको भग्नावशेष अनुसन्धानका लागि अस्ट्रेलिया ल्याइएको स्थानीय सञ्चार माध्यमहरुले जनाएका छन् ।
उक्त भग्नावशेष मलेसियाली जेट विमान बोईंग ७७७ को एउटा अङ्ग भएको अनुमान गरिएको छ । उक्त मलेसियाली विमान दुई वर्ष अघि ८ मार्च २०१४ का दिन मध्यरातमा उडान नं। एमएच ३७० अन्तर्गत २३९ जना यात्रु बोकी क्वालालम्पुरबाट चीनको बेइजिङ्गका लागि प्रस्थान गरेको थियो ।
आजसम्म हराइ रहेको उक्त विमानका भग्नावशेषहरु मध्ये १३ वटा टुक्रा अस्ट्रेलियाका एकजना सौखिन अनुसन्धाता ब्लेन गिब्सनले आफ्नै पहलमा फेला पारेर क्यानबेर्रा पु९याएका हुन् ।
अनुसन्धानपछि ती भग्नावशेष टुक्रा मलेसियाली विमान कै हुन् भन्ने पुष्टि भएको खण्डमा सो विमान दुर्घटनाबारे आजसम्म पत्ता नलागेको दुर्लभ रहस्य खुल्ने विश्वास गिब्सनले लिएका छन् ।
एउटा अस्ट्रेलियाली सञ्चार माध्यम सेभेन नेटवर्कलाई अनुसन्धाता गिब्सनले बताएअनुसार आगोले डढाएर झिल्सिएका दागहरु हाल फेला परेका सबै भग्नावशेष टुक्राहरुमा भेटिनाले विमानको कार्गो राख्ने खण्ड मात्र आगोले भेट्टाएको हो वा सम्पूर्ण विमान नै आगलागीमा परेको हो सो भने अनुसन्धानपछि ज्ञात हुने अनुमान गरिएको छ ।
अस्ट्रेलियाली यातायात सुरक्षा केन्द्र ९दि अस्ट्रेलियन ट्रान्सपोर्ट सेफ्टि ब्युरो० ले उक्त भग्नावशेष टुक्राहरु सूक्ष्म अनुसन्धान गर्ने जिम्मा लिएको छ ।
भग्नावशेष अनुसन्धानका लागि ब्युरोले मलेसियाली हवाई विभागका अधिकारीसँग सहमति र थप सूचना र जानकारी माग गरेका छन् ।
ब्युरोले मलेसियाली प्रतिनिधिलाई पनि बोलाएका र उसबाट उत्पन्न हुने विश्लेषण तथा परिणामप्रति मलेसियाली अधिकारीहरु जिम्मेदार रहने शर्तमा मात्र अनुसन्धान शुरु गर्ने समेत ब्युरोका प्रवक्ताले स्थानीय न्युज कर्प सञ्चार माध्यमलाई बताए । रासस ÷सिन्ह्वा