जनकपुरधाम : पत्रकारिताको नाममा धम्की दिई ठग्ने प्रवृति बढ्दै गएकोमा चिन्ता व्यक्त गरिएको छ ।

जनकपुरधामबाट प्रकाशित हुने दूधमति साप्ताहिक पत्रिकाको पाँचौं वार्षिकोत्सवका अवसरमा यहाँ आयोजित समारोहमा वक्ताहरूले सो चिन्ता व्यक्त गर्नुभएको हो ।

धम्की दिई नैतिक दबाब र रकमको चलखेलले पत्रकारिताप्रतिको विश्वासमा कमी आउँदै गएकोमा चिन्ता व्यक्त गर्दै उनीहरुले वस्तुनिष्ठ भन्दा पनि दलाली गर्ने र अमर्यादित ढङ्गले प्रस्तुत हुने घटनामा वृद्धि हुनु सरोकारवाला सबैका लागि चिन्ताको विषय हो भन्नुभयो ।

उनीहरुले जनताको सरोकारका नाममा तथ्यपरक नभइ आचारसंहिताको कुनै ख्याल नगरी पत्रकारिता कर्म देखापर्नु सबैका लागि घातक भएको उल्लेख गर्दै सक्रियताका आवरणमा धम्की दिई विज्ञापनदेखि समाचारमा एकाधिकार कायम गर्ने मनोविज्ञान बढदै जानु पत्रकारिताको भविष्यमाथि प्रश्नचिन्ह लागेको धारणा व्यक्त गर्नुभयो ।

सो अवसरमा प्रदेश नं २ का प्रमुख रत्नेश्वरलाल कायस्थले पत्रकार शेलेन्द्रकुमार झा र व्यवसायी प्रमोदकुमार अग्रवाललाई दूधमति साप्ताहिक सम्मान प्रदान गर्नुभयो ।

समारोहमा प्रदेशसभा सदस्य रामसरोज यादव, रामआशिष यादव र मञ्जु यादव, पत्रिकाका सम्पादक सुजितकुमार झा, नेपाल पत्रकार महासङ्घ प्रदेश नं २ का महासचिव किरण कर्ण, नेपाल पत्रकार महासङ्घ धनुषाका सभापति अनिल मिश्र, उद्योगी शिवशङ्कर साह ,उद्योग वाणिज्य सङ्ध जनकपुरका अध्यक्ष ललितकुमार साहले पत्रकारिताको विधमान अवस्था, चुनौती र उपलब्धिको विविध पक्षमाथि प्रकाश पार्नुभयो ।